Үүнээри турар өрөбүллэргэ Саха сирин киин уонна соҕуруулуу-илиҥҥи улуустарыгар өҥүрүк куйаас түһэрэ күүтүллэр. Сорох-сорох улуустарга халлаан температурата инньэ +38 кыраадыска тиийэ куйаарыа.
Халлааммыт бу да нэдиэлэҕэ куйаарар чинчилээх. Ол курдук, от ыйын 1 уонна 2 күннэригэр Саха сирин киин уонна соҕуруулуу-илиҥҥи улуустарыгар +33... +38 кыраадыс куйаас буолуохтаах. Ол туһунан Гидрометкиин Саха сиринээҕи салаатын метеорологияны уонна агрометеорологияны билгэлиир салаатын салайааччыта Саргылаана Никитина СИАҕа иһитиннэрбит.
"Кэлэр үс күҥҥэ өрөспүүбүлүкэ арҕааҥҥы уонна соҕуруулуу-арҕааҥҥы өттүгэр халлаан биир кэм уларыйа туруо – Забайкальеттан оннук халлаан иһэр. Онон, сорох сиргэ кыралаан, сороххо күүскэ ардыа, ыаҕастаах уунан кутар этиҥнээх ардах да түһүө. Оттон киин уонна илиҥҥи улуустар үрдүлэригэр сылаас антициклон кэлэн турар. Инньэ гынан, ити улуустарга өрөбүллэргэ +30... +35 кыраадыска тиийэ итийиэ. Сылыктааһын быһыытынан, куйаас бу да нэдиэлэҕэ сөҕүрүйэр санаата суох. Төттөрүтүн, субуотаҕа-баскыһыанньаҕа +33... +38 кыраадыска кытта тиийэ”, – диэн Саргылаана Никитинэ кэпсиир.
Бүгүн, ол эбэтэр бэс ыйын 30 күнүгэр, өрөспүүбүлүкэ хотугу өттүгэр кыра циклон кэлэрэ күүтүллэр. Ону кытта сөкүүндэҕэ 15-20 миэтэрэ түргэннээх тыал түһүөҕэ. Халыма-Индигиир улуустарыгар ардыаҕа, тыалырыа, ол түмүгэр, салгын температурата 8-13 кыраадыһынан сөрүүкүө.
Соҕуруулуу-илиҥҥи уонна хотугулуу-арҕааҥҥы улуустарга сөҥүү түһэрэ күүтүллүбэт. Атын сирдэргэ көтө сылдьан, чуолаан Ленскэй улууһугар, быстах этиҥнээх ардах түһүө. Улахан тыала суох. Арай этиҥнээх ардах кэмигэр сөкүүндэҕэ 15-20 митэрэ түргэннээхтик тыалырыа.
Киин улуустарга түүнүн +15... +20, арҕааҥҥы улуустарга +9... +14, хотугулуу-арҕаа +2... +7 кыраадыс сылаас буолара күүтүллэр.
Дьокуускай куоракка бүгүн, бээтинсэҕэ, быстах ардыа. Сөкүүндэҕэ 5-10 митэрэ түргэннээхтик үрэр тыаллаах. Күнүс +31... +33 кыраадыс куйаас буолара күүтүллэр.
СИА хаартыската.
