Бүгүн СӨ Тутууну уонна дьиэни-уоту кэтээн көрөр судаарыстыбаннай управлениетын салайааччыта Павел Аргунов «Якутия с тобой!» уопсастыбаннай хамсааһыҥҥа 200 тактическай «куосканы» тиксэрдэ.
«Тактическай «куоскалары» оҥорор толкуй анал байыаннай дьайыы кыттыылааҕа, сапер Анатолий Храмовы кытта кэпсэппитим кэннэ кэлбитэ. Кини бу универсальнай тэрил сапердарга эрэ буолбакка, бары байыастарга баар буолуохтааҕын эппитэ. Бу тэрили оҥорторорго көмөлөспүт Жатай урукку баһылыгар Анатолий Кистеневка уонна босхо оҥорон биэрбит Жатайдааҕы тимир конструкция собуотун салалтатыгар махтанабын», - диэн Павел Аргунов кэпсээтэ.
Кини бэлиэтээбитинэн, тактическай «куоскалары» элбэх бойобуой соругу толорорго: миинэни эстибэт оҥорууга, сэрэхтээх малы тургутан көрүүгэ, сыҕарытыыга, суолу миинэттэн ыраастааһыҥҥа, ааны арыйарга кытары тутталлар. Ону таһынан кутааҕа ас астыыр, үөһэ хатаастан тахсар кыһалҕа үөскээтэҕинэ эмиэ туттуохха сөп.
«Якутия с тобой!» уопсастыбаннай хамсааһын салайааччыта Айыл Дьулурҕа тимир пластиналартан турар тэрил олус судургутук хомулларын бэлиэтээтэ уонна бу күннэргэ байыастарга ыытыахпыт диэн эттэ.
