»Российская газета» бүгүҥҥү нүөмэригэр премьер Владимир Путин быыбар иннинээҕи уочараттаах ыстатыйата таҕыста. Ыстатыйа сүрүн тиэмэтинэн Арасыыйаҕа куттал суох буолуутун мэктиэлиир күүстэри сайыннарыы буолбут. Кэккэ этиилэр быыстарыгар сүрүн быһыытынан байыаннай полицияны тэрийии турбут. Ону тэҥэ байыаннай наука сайдарыгар ахсаабат болҕомтону уурары, байыаннайдар социальнай кыһалҕаларын чопчу быһаарары тоһоҕолообут. Ыстатыйаҕа Путин Арассыыйа аармыйатыгар байыаннай эрэ идэлээх дьон сулууспалыырын ситиһэргэ дьулуһарын эппит. 

Бэҕэһээ күнүс, олунньу 19 күнүгэр, Орто Халыма куоратын ититэр икки хочуолунай үлэтэ харгыстанна. Куорат тоҥор балаһыанньаҕа киирэр кутталланна. Саахал төрүөтүн туһунан билиҥҥи бириэмэҕэ туох да биллибэт. Ол гынан баран улахан кутталлаах быһыы-майгы үөскүө суоҕа, саахал түргэн кэминэн туоратыллыа диэн оройуон дьаһалтата дьону уоскуппут. Өрөспүүбүлүкэ ОДЬКХ министиэристибэтин пресс-сулууспата иһитиннэрбитинэн, билигин Орто Халымаҕа үлэ-хамнас күөстүү оргуйар.

Дьокуускай куорат суута 100 тыһ. солк. бэрик ыла сатаабыт полицейскайы 3 мөлүйүөн солк. ыстыраапка уурда. Быйыл сэтинньи 1 күнүгэр полиция капитана куорат биир улахан тэрилтэтин генеральнай дириэктэригэр тэриллибит холуобунай дьыаланы сабыам диэн эрэннэрэн, бэрик көрдөөбүт. Тэрилтэ салайааччыта тустаах сулууспаларга сайабылыанньа суруйан хачыгыраппыт. Инньэ гынан сэтинньи 7 күнүгэр полиция үлэһитэ бэрик ылан харытыттан харбаммыт.

Дьокуускай куорат ОДьКХ Департамена иһитиннэрэринэн, олунньу 15 күнүттэн кулун тутар 5 күнүгэр диэри бөҕү-сыыһы куорат сыбаалкатыгар (Бүлүүлүүр аартык, 9 км) босхо туталлар. Бу туһунан олунньу 14 күнүгэр аналлаах дьаһал таҕыста. Онон болдьоҕу баттаһа таарыйа, бөхтөн-сыыстан ыраастанаргытын умнумаҥ.

Субуотаҕа, олунньу 18 күнүгэр, Орто Халыма Хатыҥнааҕар тыа кулууба умайан хаалла. Кулууп дьиэтэ былыр 1959 сыллаахха тутуллубут. Инньэ гынан биирдэ күлүм гыммыт. Саатар ыраах дэриэбинэҕэ баһаарынай сулууспа суоҕа эмиэ «атахтаабыт». Хаһан баһаарынайдар ыраахтан таҥкынаан кэлиэхтэригэр диэри кулууп бүүс-бүтүннүү умайбыт. Умайбыт кулууп дьиэтигэр быыбардыыр учаастак былааннаммыт эбит. Билигин баһаар буолбутунан сибээстээн быыбар учаастага дьаһалта дьиэтигэр көстө.

Былырыын балаҕан ыйыгар Уус Алдан Хомустааҕын икки олохтооҕо арыгы иһэн баран үһүс киһилэрин хардаҕаһынан уонна сүгэ ончоҕунан кырбаан өлөрбүттэр. Иирсээн төрдө кыра да буолан биэрбит: ыалдьыт хоноһолоору суорума суолламмыт. Бастаан утуйар ороннорун былдьаспыттар, онтон үргүччү урукку-хойукку өһүргэнсиини ахтыспыттарын түмүгэ ити курдук буолбут. Билигин холуобунай дьыала силигин ситэн, суукка утаарылынна.

Быыбар дойду үрдүнэн кулун тутар 4 күнүгэр буолар. Ол да буоллар кырыы сытар ыраах нэһилиэктэргэ дойду президиэнин быыбара болдьох иннинэ саҕаланна. Киин быыбардыыр кэмитиэт иһитиннэрэринэн, болдьох иннинэ кулун тутар 3 күнүгэр диэри куоластыахха сөп. Бэлиэтээн эттэххэ, Россия быыбарга кыттар олохтоохторун 1%-ра ыраах, суола-ииһэ суох сирдэргэ олороллор. Маны таһынан ууга сылдьар судно уонна полярнай станция үлэһиттэрэ эмиэ болдьох иннинэ быыбардыахтара. СИА

Бүлүү улууһугар бырабыыталыстыба отчуота саҕаланна. Правительство бэрэссэдээтэлин солбуйааччы Павел Маринычев салайар анал делегацията бу күннэргэ Бүлүү улууһун бары нэһилиэктэригэр сылдьан, бырабыыталыстыба ааспыт сыллаах үлэтин-хамнаһын отчуоттуур, улуус кыһалҕалаах боппуруостарын ырытыһар. Делегацияҕа үөрэх миниистирэ Афанасий Владимиров, С£ баайга-дуолга министиирин солбуйааччы Михаил Никифоров, айылҕа харыстабылын миниистирин солбуйааччы Яков Заровняев, ОДЬКХ-гар уонна энергетикаҕа миниистирин солбуйааччы Александр Корякин, доруобуйа харыстабылын миниистирин бастакы солбуйааччы Ганна Егорова о.д.а. киирдилэр. 

Афанасий Владимиров олунньу 15-16 күннэригэр Арыылаахха, Өкүндүгэ, Таһаҕарга сырытта, оттон бүгүн, олунньу 17 күнүгэр, Бүлүү куоракка буолар түмүктүүр мунньахха кыттар. СИА.

Аныгыскы нэдиэлэҕэ дойду президиэнэ Дмитрий Медведев бэйэтин утарсааччыларын – Борис Немцов, Владимир Рыжков, Сергей Удальцов уонна да атын кэккэ араспаанньалар ааттаналлар - кытары көрсөр былааннаах. Кини билигин дойдуга ыытылла сылдьар политиканы утарсааччылары кытары уларыйыылар тустарынан дьүүллэһэр уонна кэпсэтэр былааннаах. Немцов президент кэпсэтиигэ этиитэ киирбитин бигэргэттэ уонна бастакынан Госдуума  быыбарын түмүгүн уларытарга, ону сэргэ билигин политическай матыыбынан хаайыыга сытар дьону босхолуур туһунан туруорсарын тоһоҕолоото. Немцов, маны таһынан,  президент биир эрэ болдьоххо былааска олорорун булгуччу туруорсарын умнубата.

Үс эр бэртэрэ, сүүрбэччэлээх уолаттар, Дьокуускай куоракка «Тойота Корона Премио» массыынаны уоран баран, Бүлүүгэ илдьэн баара-суоҕа 20 тыһыынча солк. атыылаабыттар. Атыыласпыт киһи докумуона-таймата суох массыынаны тугу да билбэтэҕэ буолан үөрэ-көтө тиэргэнигэр туруоран кэбиспит. Бүлүү ГИБДД үлэһиттэрэ саахалга түбэспит атын массыынаны көрдүү сылдьан, уорбалаан, атыыламмыт массыына мотуорун нүөмэрин бэрэбиэркэлээбиттэр. Инньэ гынан барыта ырылыччы көстөн тахсыбыт. Уолаттар тутулуннулар.

Саха сиригэр сыл саҕаланыаҕыттан бөрө үөрэ 213 табаны, 19 сылгыны уонна 10 сүөһүнү тардыбыт. Бу туһунан өрөспүүбүлүкэ ветеринариятын салаатын салайааччыта Лариса Макарова иһитиннэрдэ. Былырыыҥҥы сыыппаралар өссө дьулааннар эбит: бөрө үөрэ 13226 табаны уонна 424 сылгыны тардыбыт. Аҥардас Алдан оройуонугар, дьаһалта саайта кэпсииринэн, бу олунньу ыйга 240-ча адьырҕа кыыл өрө сыбыытаан улахан кутталы үөскэппит.

Сыана бэлиитикэтин судаарыстыбаннай кэмитиэтин үлэһиттэрэ олунньу ый саҥата Нам улууһугар тиийэн аптекалары бэрэбиэркэлээтилэр. Нам сэлиэнньэтигэр баар «Корнилова» ИП аптекатыгар бэрэбиэркэ ыытыллыбытын түмүгэр, бу аптекаҕа сыананы үрдэтии бэлиэтэммэтэ. Барыта сөпкө атыылана туруоруллубут сыананан сөпкө атыылана турар эбит.

Бу күннэргэ Дьокуускай куорат прокуратурата И. Бабаева диэн дьахтар холуобунай дьыалатын көрөн, кинини 3 сыл болдьохтоох хаайыыга уурда. Түргэнник байар сыалтан бу дьахтар саамай сатыыр содур дьыалатынан дьарыгырбыт. Түөрт сылы быһа киин куоракка проститутка өҥөтүгэр наадыйар эр дьону быыстала суох хааччыйан «дьоллообут». Онтон арыый да атаҕар туран, бэйэтэ оннук өҥөнү оҥорор тэрилтэни аспыт. «Түүҥҥү үрүмэччилэрин» «үчүгэй» үлэнэн хааччыйаары урбаан киэнэ кытаанаҕын тэрийбит. Мэктиэтигэр бэйэлээх бэйэтин сааһын ситэ илик балтын дьыалаҕа тардыбыт.

«Ситим» медиа-бөлөх, «Байдам» сурунаал уонна «Симэх» галерея Ийэ тыл күнүн чэрчитинэн,  «Алгыстан айар кут» быыстапка-дьаарбаҥканы тэрийэн ыытта. Онно Нам, Мэҥэ Хаҥалас, Үөһээ Бүлүү, Бүлүү, Чурапчы, Дьокуускай, Уус Дьааҥы улуустарыттан норуот маастардара кытыннылар. Кыайыылаахтарынан буоллулар:

Өрөспүүбүлүкэҕэ ыытылла турар төрөөбүт тыл декадатын чэрчитинэн, «КиберСаха» диэн түмсүү компьютер клавиатуратыгар сыһыарыллар сахалыы буукубалардаах стикердэри тарҕатта. Курдаттыы көстө сылдьар сахалыы буукубалардаах стикердэр Санкт-Петербург куоракка сакааһынан оҥоһуллубуттар. Стикердэр сиһилии быһаарыылаахтар, туттарга олус судургу эбиттэр диэн СӨ тыл бэлиитикэтин Сэбиэтэ иһитиннэрэр. Билиҥҥи кэмҥэ сыһыарыллар стикердэр ордук сырдык клавиатураҕа барсаллар. Кэнэҕэски, былаан быһыытынан,  маннык стикердэр өссө ордук тупсарыллыахтарын сөп эбит.

Бүгүн, олунньу 16 күнүгэр, күнүс 30-32 кыраадыс тымныы, уларыйа сылдьар былыттаах, салгын баттааһына нуорматтан арыый да үрдүк. Түүн былыта суох, халлаан 30-32 кыраадыс тымныы буолар. Сарсын, олунньу 17 күнүгэр, кыралаан кыраһалыыр уонна сарсыарданан туманнаах буолар, күнүс 22-24 кыраадыска диэри сылыйыа  диэн халлааны кэтээн көрөөччүлэр биллэрэллэр.

Бэҕэһээ, олунньу 15 күнүгэр, «Юность» манежка Юрий Пестерев кэриэһигэр боксаҕа Саха сирин XV турнира саҕаланна. Күрэхтэһиини ХИФУ, бокса республикатааҕы федерацията, Ю.Пестерев дьиэ кэргэнэ уонна доҕотторо тэрийдилэр. Турнирга ХИФУ, ДЮСШ-6, ДЮСШ-5, ДЮСШ-4, УОР, Хаҥалас, Чурапчы, Ньурба, Өлөөн, Бүлүү улууһун хамаандалара кытталлар. Турнир полуфинала сарсын, олунньу 17 күнүгэр, буолар, оттон түмүктүүр күрэхтэһии олунньу 18 күнүгэр ыытыллар. 

Турнир кылаабынай судьуйата — норуоттар икки ардыларынааҕы категориялаах судьуйа Александр Саморцев (Ленскэй к.). СИА

Дьокуускай куорат 4 нүөмэрдээх маҕаһыын үлэһиттэрэ Саха сирин президиэнигэр Егор Борисовка аһаҕас сурук суруйдулар. Үлэһиттэр сурукка сэбиэскэй саҕаттан куорат олохтоохторугар киэҥник биллэр маҕаһыын үлэтэ кэнники бириэмэҕэ харгыстаммытын, саҥа салайааччылара В. Местников коллективка уустук уонна ыарахан  балаһыанньаны олохтообутун, бэйэтин байытар сыалтан маҕаһыыҥҥа кэргэнэ үлэлиир чааһынай  тэрилтэтин босхо «дьукаахтаабытын», саҥа салайааччы уруккуттан үлэлиир дьоҥҥо тыйыс сыһыаннааҕын, суот-учуот дьыалата улаханнык доҕолоҥнообутун туһунан  аһаҕастык суруйбуттар.