Мэҥэ Хаҥалас улууһун Майа сэлиэнньэтигэр тутулла турар ССРС норуодунай артыыһа Дмитрий Ходулов аатынан Элбэх хайысхалаах култуура-сынньалаҥ холбоһуга киини быйыл, 2020 сыл ахсынньытын бүтүүтэ, үлэҕэ киллэриэхтэрэ.
Бу тутуу СӨ Ил Дархана Айсен Николаев сорудаҕынан, өрөспүүбүлүкэ “Үүнэр көлүөнэ тус сыаллаах пуондатын” “Кэскил туһугар” диэн бырагыраама “Содействие” хос-бырагырааматын чэрчитинэн тутуллар. Үбүлээһини “АЛРОСА” АХ (ПАО) көҥүл өттүнэн көмөлөһүү быһыытынан оҥорор. Быһааран эттэххэ, Пуонда нөҥүө баҕа өртүнэн өрөспүүбүлүкэҕэ көмөлөһүүгэ АЛРОСА аҥаардас 2019 сылга 850 мөл. солк. ыыппыта.
Майаҕа дьэндэйиэхтээх социальнай эбийиэк сакаасчыта – «Дирекция по строительству» ХЭУо, генеральнай бэдэрээччит – «Мегинострой» ПК. Тутууга билигин үлэ күөстүү оргуйар.
СӨ “Үүнэр көлүөнэ тус сыаллаах пуондата” кэмиэрчэскэйэ суох тэрилтэ пресс-сулууспата иһитиннэрбитинэн, күн бүгүҥҥү туругунан, тутуу 74 %-на бэлэм. Ол курдук, тутуу каркааһа таһаарыыллыбыт, үрдүн бүрүйбүттэр, түннүктэрэ олордуллубуттар.
Онон үлэһиттэр тутуу иһинээҕи үлэтин толоро сылдьаллар, салгын киирэрин-тахсарын хааччыйар тэрилин олордоллор, сылытыы турбаларын уонна радиатардары тардаллар, тас өттүттэн сылаас буоларын хааччыйар үлэни толороллор.
Элбэх хайысхалаах киин икки этээстээх, 3000 кв м чугаһыыр иэннээх, тупсаҕай оҥоһуулаах таас тутуу гына бырайыактаммыт. Дьиэ бастакы этээһигэр 300 көрөөччү олорон көрөрүгэр сөптөөх олбохтордоох киэҥ-куоҥ саала, 100 миэстэлээх эбиэттиир саала, декорацияны харайар хос, вестибюль-фойе, инбэлииттэри көтөҕөр анал сириэстибэ, дьаһалта кэбиниэттэрэ уонна уопсастыбаннай аналлаах хостор – каасса, таҥас устар-ыйыыр сир уо.д.а. баар.
Оттон иккис мэндиэмэҥҥэ 50 олбохтоох киинэ көрдөрөр саала, фитнесстиир саала уонна сыгынньахтанар-таҥнар сирдээх хореография кылаастара түстэниэхтэрэ.
Бу саҥа, социальнай хабааннаах таас тутууга оройуон эрэ буолбакка, өрөспүүбүлүкэ таһымнаах култуура-маассабай тэрээһиннэр ыытыллыахтара. Оройуон олохтоохторугар манна араас тиэмэлэрдээх маастар-кылаастары тиһигин быспакка ыытыахтара. Оҕо, ыччат да дьон бу манна санаалара сытар, сэргиир дьарыктарын булаллара саарбахтаммат. Холобур, үҥкүү куруһуоктара, успуорт уонна доруобуйаны чэбдигирдэр, чөлүгэр түһэрэр сиэксийэлэр, эрчиллиилэр тэриллиэхтэрэ.
Ити курдук, Майаҕа түстэнэр култуура-сынньалаҥ холбоһуга чахчыта да Мэҥэ Хаҥалас улууһун, Саха сирин атын да оройуоннарын олохтоохторун култуураҕа-духуобунаска сирдиир килбэйэр киин сиргэ кубулуйуо турдаҕа.
“АЛРОСА” алмаас хампаанньатын үбүлээһининэн, билиҥҥи туругунан, биһиги өрөспүүбүлүкэҕэ өссө үс бөдөҥ социальнай эбийиэк тутулла турар. Олор истэригэр поликлиникалаах уонна 30 куойкалаах, терапевтическай уонна оҕо эмтэнэр отделениелаах, биир симиэнэҕэ 180 көрдөрүнээччини хааччыйар кыахтаах балыыһа үөһээ Дьааҥы Баатаҕай бөһүөлэгэр тутулла турар. Балыыһа быйыл, 2020 сыл күһүнүгэр хайыы үйэ үлэҕэ киириэхтээх.
Ону таһынан, быйыл Уус Алдан Бороҕон сэлиэнньэтигэр уонна Нам оройонун киинигэр Намҥа култуура кииннэрин тутуу саҕаламмыта. Бу тутуулары бүтүн уопсастыбаннас үөрэ-көтө бэлиэтиэхтээх САССР тэриллибитэ сүүс сыллаах үбүлүөйүгэр уонна ону тэҥэ биллиилээх политическай уонна уопсастыбаннай деятель, Саха сиригэр судаарыстыбаннаһы олохтоспут, бүтүн норуот киэн туттуута буолар Максим Аммосов – Чаҕылхай Максим үбүлүөйүгэр бэлэм гынары былаанныыллар. 2022 сыл биир бэлиэ түгэнэ – Уус Алдан Бороҕонугар ыытыллыахтаах Саха сирин норуоттарын VIII Спортивнай оонньуута буолуоҕа.
Манна даҕатан эттэххэ, “АЛРОСА” АХ (ПАО) 2011 – 2019 сылларга баҕа өртүнэн көмөлөһүү быһыытынан “Үүнэр көлүөнэ тус сыаллаах пуондатыгар” 5,439 млрд солк. тахса үбү көрөн, социальнай хайысха сайдыытыгар төһүү кылааты киллэрбитэ.
Яна Байгожаева матырыйаалынан, Лоһуура
