Билигин сайдыылаах бириэмэ харчылаах эрэ буол, ханна баҕарар сынньанан кэлиэххин сөп.  Оҕо сынньалаҥын тэрийэр үгүс лааҕырдар үлэлииллэр. Тыа оҕото өссө сайыҥҥы сынньалаҥын оттоон-мастаан туһалаахтык атаарар, оттон куорат оҕото дьарыга суох буолан хаалар тугэнэ аҕыйаҕа суох. Маннык оҕолорго төрдүс сылын СӨ «Ыччат социальнай уонна психологическай өйөбүлүн киинэ» «Күннээх сынньалаҥ» диэн ааттаах  күнүскү лааҕыры тэрийэн үлэлэтэр.

Манна 13-тэн 17-гэр диэри саастаах куоракка олорор уонна  ханна да сынньана барбатах  оҕолор сылдьыахтарын сөп. Лааҕыр психологическай хайысхалаах. Сурун сыала-соруга - оҕо кэпсэтэр дьоҕурун сайыннарыы, бэйэтин кыаҕын арыйыы буолар. Манна тэрилтэ психологтара оҕоҕо туһалаах үгүс элбэх  трениннэри ыытыахтара, маны тэҥэ кинилэри культурнай сынньалаҥ эмиэ күүтэр. Лааҕыр салайааччыта психолог Светлана Васильева этэринэн,   быйылгы программаҕа Булуус  дьиктилэрин арыйыы эмиэ киирбит. Оҕолору лааҕырга сылдьар кэмнэрин устатыгар психологтар туруктарын, кыахтарын, дьоҕурдарын кэтээн көрүөхтэрэ. Ол барыта төрөппүккэ сиһилии тиэрдиллэр. Бастакы сезон номнуо арыллан, үлэтэ-хамнаһа күөстүү оргуйар. Иккис сезон бэс ыйын 27 күнүттэн – от ыйын 3-гэр диэри үлэлиэҕэ.  Онон ким баҕалаах бу лааҕырга суруттаран, күннээх сынньалаҥҥытын туһалаахтык атаарыаххытын сөп.

Аадырыстара: Дьокуускай к., Каландаришвили уул, 21. СӨ "Ыччат социальнай уонна психологическай өйөбүлүн киинэ". Тел. 35-10-46.

                                                               Наталья Колесова