Бөҕө-таҕа, тупсаҕай көрүҥнээх, дьиҥнээх мастан оҥоһуллубут миэбэли удамыр сыанаҕа булар олус уустук. Сыаната чэпчэкитинэн ымсыыртаҕына сонно алдьанар кэбирэх буолар, эбэтэр син хаачыстыбалааҕа умсугуттаҕына сыаната суулларан түһэрэр.

Маннык балаһыанньаҕа, төрүт үгэспитигэр төннөрбүт абыраллаах. Саха – маска, тимиргэ, көмүскэ дэгиттэр уустарын «маһы хаамтарар киһи», «талааннаах тарбах», «көмүс илии» диэн уостан уоска түһэрэн суон сурахтыыра. Өбүгэбит итэҕэлигэр уус ойууннааҕар үрдүк таһымҥа турара даҕаны, бу дьон ураты улахан суолталаахтарын ыйар.

Дьокуускай Хатыҥ Үрэҕин түөлбэтигэр, бу сааскыттан ыла, «МАСТАН» диэн дьоҕус тэрилтэ дьиэ-уот туттан үлэлээн-хамсаан эрэр.  Салайааччылара – Евгений Васильевич Ильин, отуччалаах эрэ эдэр киһи. Үөһээ Бүлүүттэн көһөн кэлэн доҕорунаан миэбэл оҥорорунан дьарыктаммыт. «Мас атыылыыр баазалары кэрийэ сылдьан хаппыт, хаачыстыбалаах маһы талан ылан араас миэбэл оҥоробут. Биир да оҥоһук иккистээн хатыламмат. Дьон санаатын табарга дьулуһабыт. Хас сырыы аайы тупсаран иһэбит », -- диэн Евгений судургутук, аҕыйах тылынан, үлэтин сыалын этэр.

Уолаттар тыаҕа үлэтэ суох сылдьар бырааттарын аҕалан үлэлэтэллэр эбит. «Урут уһамматах буолан үөрэнэллэригэр элбэх матырыйаалбын буортулаатылар», -- диэн убайдара күлэр. Киһи киһиттэн үөрэнэр. Кэлин, үөрэнээччилэрэ уһанарга ылларан, умсугуйан туран үлэлиир буолбуттарын хайҕаталыыр.

Евгений эдэр киһи диэтэххэ, дуоспуруннааҕын, тыла-өһө олохтооҕун, сыала-соруга дьэҥкэтин ытыктыы көрдүм. Эр киһи диэн маннык буолуохтаах. «Үлэ суох» диэн сылтаҕыран, барарга-кэлэргэ иҥээҥнээн, арыгылаабыта буолан, таах саах тэбэ сылдьар уолаттар бааллар ээ. Киһи кыһаннаҕына-соруннаҕына, үлэлии сатаатаҕына үлэ баар буоллаҕа. Холобур, Евгений баҕалаах дьону буор-босхо маһынан уһанарга үөрэтэр эбит. «Улаханнык уһанар тэрилтэ да аспатахтарын иһин, бэйэлэрин дьиэлэрин-уоттарын көрүнэллэригэр көмөлөһүө», -- диир.

-- Оттон бэйэҥ уһанарга хантан үөрэммиккиний? – диэн ыйытабын.

-- Аҕам да, ийэм да өттүнэн уус дьон бааллар, -- диэн этэр. Таайа музыка инструменнарын оҥорор уус киһи эбит. -- Аҕам, Василий Егорович урут, Үөһээ Бүлүү промкомбинатын салайан үлэлэппитэ. Кыра эрдэхпиттэн аҕабын батыһа сылдьан уһанарга үөрэммитим, -- диэн уол кэпсиир. Евгений мас таҥастыыр  инженер үөрэхтээх эбит. Билигин инженер-механик идэтигэр кэтэхтэн үөрэнэрин туһунан этэр.

Бэйэ дьыалатын саҕалыырга харчы-үп наада. Уһанар станоктар бэрт сыаналаахтар. Ону Евгений «үс үлэҕэ үлэлээн, харчы мунньунан, кыра-кыралаан ылынан испитим, сыыйа-баайа саҕалаабытым» диэн кэпсиир. Үөһээ Бүлүүгэ мастарыскыай аһан үлэлэтэ олордоҕуна, табаарыһа Дьокуускайга сир ыллым, үлэлиэххэ диэн ыҥырбытыгар, бу саас көһөн кэлбит. Сирдэригэр улахан мастарыскыай туттан кулун тутартан үлэлээн киирэн барбыттар. «Саастаах дьон кэлэн, миэбэлбитин көрөн баран, төбөбүтүттэн имэрийэн бараллар. Кинилэр, урут хайдах хаачыстыбалаах миэбэл оҥоһулларын өссө өйдүүллэр. Бөҕө-таҕа уонна аныгы, кыраһыабай көстүүлээх миэбэли оҥорорго дьулуһабыт», -- диэн уолаттар кэпсииллэр.

Кырдьык, билигин сорох «уһанааччылар» инчэҕэй маһынан киллиргэтэн, килиэй үөһээ килиэйдээн, тоһоҕо үөһээ тоһоҕо саайан баран, атыыланнын эрэ диэн миэбэл «оҥороллор». Онтукалара сылааска киирдэҕинэ хайыта барар, тимирэ-туһаҕа уон аҥыы саккырыыр.

-- Үлэһиттэриҥ эдэрдэр эбит. Уол аймах мустубута аһыан-сиэн баҕарбат дуо?

-- Нэдиэлэ бүтэһигин диэкиттэн саҕалаан арыгы куһаҕанын туһунан «лиэксийэ» ааҕан барабын. Бэйэм испэт буолан, ити аһы олох убаастаабаппын. Арыгыны батыһартан туох да көдьүүстээх тахсыбат, -- диэн Евгений санаата лоп-бааччы буолла.

Евгений былыргылыы, реклама диэни билбэккэ үлэлии олорор. Дьон дьонтон истиһэн сакаастыы кэлэр эбит. Ити элбэҕи этэр. Кэлэйбиттэрэ буоллар кэлэн бэрт.

Онон, куорат олохтоохторо, үлэлии сатыыр ыччаты өйөөн, бу оҕолор өҥөлөрүнэн туһанаргытыгар сүбэлиэм этэ. Кырдьык, тупсаҕай, бөҕө-таҕа миэбэли удамыр сыанаҕа бэйэбит дьоммут оҥорор кыахтаахтар бөҕө буоллаҕа. Тоҕо кэлии омук тугунан тутан-самаан оҥорбута биллибэт, киһи үргүлдьү ааһар, тосту олорор кэбирэх миэбэлин ылыахтаахпытый?

«МАСТАН» төлөппүөнэ: 755-642.