Муммут дьахтар көһүннэ

Бүгүн, от ыйын 26 күнүгэр, Амма улууһун Сулҕаччы нэһилиэгэр, ойуурга тахсан баран сүппүт 63 саастаах дьахтары буллулар. Ол туһунан нэһилиэк баһылыга иһитиннэрдэ.

Биэнсийэллэх, Софья Николаевна ааспыт суббуота күн сүппүтэ. Тыаҕа сир астыы сылдьан, аргыстарыттан хаалбыт. Ойуурга муммут дьахтары бүтүн дэриэбинэнэн тахсан көрдөөбүттэр да булбатахтар. Икки суукка ааспытын кэнниттэн, бүгүн сарсыарда эрэ кинини буллулар.

«Дьахтары буллубут, туруга чэгиэн. Кинини олохтоох киһи булла. Булбут киһи кэпсииринэн, дьахтар тыраахтар тыаһын истэн бэйэтэ дьоҥҥо тахсан кэлбит. Бастакы сүппүт түүнүгэр курулас ардах түспүтэ. Саастаах киһи түүнүн тымныйдаҕына ирээри хааман, күнүһүн сылыйдаҕына утуйан, күнүн-дьылын бараабыт. Билиҥҥитэ кини этэҥҥэ.

Дьон биһиэхэ мээнэ муммат. Үксүн, кэлии дьон сиргэ тахсан хайысхаларын сүтэрэллэр. Холобур, былырыын биир атын сиртэн кэлбит дьахтар сүппүтэ, көрдөөн эмиэ булбуппут », - диэн кэпсиир нэһилиэк баһылыга Афанасий Ксенофонтов.

Бу иннигэр, социальнай ситимнэргэ, бу сүппүт дьахтары Сэргэ-Бас диэн сиргэ тыатааҕы тардыбыт, диэн сурах тарҕаммыта. Саха сирин Быыһыыр Сулууспатыгар бу иһитиннэриини бигэргэппэтилэр. Амма улуууһун Сулҕаччы нэһилиэгин дьаһалтатыттан, биэнсийэлээх кырдьаҕас, чахчы Сулҕаччы таһыгар, Сэргэ-Бэс диэн сир таһыгар муна сылдьыбытын уонна этэҥҥэ көстүбүтүн туһунан иһитиннэрдилэр.

Онуоха маарынныыр түбэлтэ от ыйын 19 күнүгэр, Томпо оройуонугар таҕыста. 80 саастаах дьахтар, Саһыл нэһилиэгэр, Кытыл диэн сиргэ мунан баран көстүбэтэх. Уопсай көрдөөһүн түмүгүнэн, кырдьаҕас киһини сүппүтэ иккис күнүгэр биирдэ булбуттар.

Чорботон эттэххэ, өрөспүүбүлүкэҕэ билигин сир аһын кэмэ. Дьон билбэт сирдэригэр тахсаллар. Муналлар. Саха сирин Быыһыыр Сулууспата сэрэтэр, өскөтүн эһиги тыаҕа тахсан мунан хааллаххытына уолуйумаҥ. Билиҥ, эһигини көрдүүллэр. Туох баар күүс барыта үмүрү тардыллан.