Дьокуускай куорат дьаһалтатын нэдиэлэтээҕи мунньаҕар киин куоракка туох-ханнык быһылаан буолбутун билиһиннэрдилэр. Оперативнай сводка тугу көрдөрдө?
Тохсунньу 11-17 күннэригэр 12 баһаар тыхсыбыт. Дьолго, улахан, киһи өлүүлээх, эчэйиилээх уот турбата. Сыл саҕаланыаҕыттан 48 баһаар бэлиэтэммит (ааспыт сылга - 38).
Ааспыт нэдиэлэҕэ 10 буруйу оҥоруу бэлиэтэммит, онтон 7-тин арыйбыттар. 7 ыар уонна ордук ыар буруйу оҥоруу тахсыбыт, онтон 5-ин арыйбыттар. Ити иннинээҕи оҥоһуллубут буруйдартан 26-тын арыйбыттар: 2 киһи доруобуйатын ыараханнык энчирэтии, 10 уоруу, 2 халааһын, 1 талабыр, 3 түөкүннээһин уонна 8 атын буруйу оҥоруу. 31 буруйдааҕы быһаарбыттар, олортон 5 урут сууттана сылдьыбыт, 5 дьахтар уонна биир сокуоннай сааһын туола илик оҕо. 3 киһи сураҕа суох сүппүтүн туһунан иһитиннэрии киирбит, олортон 2 оҕо сүппүт. Икки киһини булбуттар, ол иһигэр биир обургу саастаах оҕону. Биир оҕо сибээскэ тахсыбыт, бу оҕо дьиэтиттэн куруук тахсан барар кэмэлдьилээх эбит, ПДН учуотугар турар. 5 киһи туох да кириминээл сибикитэ суох өлүгүн булбуттар, 2 киһи бэйэтигэр тиийинэн өлбүт.
Ааспыт нэдиэлэҕэ 1436 административнай боротокуол суруллубут. Анал приемникка 33 быраабы кэһээччини аҕалбыттар, олортон бэҕэһээҥҥи туругунан 28 киһи хааллан сытар. ИВСка (быстах кэмҥэ хаайар изолятор) 11 киһи сытар, 7 киһи тутуллубут. Мааска эрэсиимин тутуһуу туһунан 861 профилактика бэсиэдэтин ыыппыттар, 79 боротокуол толороллубут. 3077 боротокуолу суут көрбүт.
98 алкомаркеты бэрэбиэркэлээбиттэр, арыгы сокуонун 5 кэһиитэ биллибит, 7 лиитирэ арыгыны былдьаабыттар.
Тырааныспар полицията иһитиннэрбитинэн, ааспыт нэдиэлэҕэ 14 буруйу оҥоруу тахсыбыт, ол иһигэр биир уоруу, 3 сэрии сэбин сокуоннайа суохтук эргитиигэ аналлаах буруй, 7 - сымыйа докумуону оҥорууга сыһыаннаах буруйдар. 206 административнай боротокуолу толорбуттар: 6 - тырааныспарка бэйэ бодотун тардымматах дьоҥҥо, миграция сокуонун кэһиигэ - 4, ЧС быраабылатын, бэрээдэгин кэспит 86 боротокуол суруллубут.
Ааспыт нэдиэлэҕэ 59 суол саахала тахсыбыт. Икки киһи суорума суолламмыт, 8 киһи эчэйбит. 875 быраабыланы кэһии тахсыбыт, 36 итирик суоппар тутуллубут. Дьону тиэйиигэ сыһыаннаах 8 административнай дьыала көбүтүллүбүт (5 физическэй сирэйдэргэ, 3 - дуоһунастаах дьоҥҥо).
16576 коронавирус инфекцията бигэргэммит, ааспыт сууккаҕа - 65, олортон 10 оҕо. 1753 тумуу ыарыылааҕы быһаарбыттар.