Таатта улууһугар «Доҕордоһуу» оҕо үҥкүү народнай ансаамбыла үбүлүөйдээх 50 сылынан Саха сиригэр улахан ситиһиини аҕалла. Соҕуруу Корея Чонан куоратыгар ыытыллыбыт аан дойдутааҕы норуот үҥкүүтүн күрэҕэр Россия аатын чиэстээхтик, үрдүк таһымҥа көмүскээтэ, «Сүктэр кыыс тойуга”, “Битии”, «Байанайдыын алтыһыы» үҥкүүлэрэ миэстэлэстэ.
Таатта улууһугар «Доҕордоһуу» оҕо үҥкүү народнай ансаамбыла быйыл 2019 сылга тэриллибитэ үйэ аҥаардаах үбүлүөйүн өрө күүрүүлээхтик бэлиэтээтилэр. П.А.Ойуунускай аатынан Таатта народнай театрыгар, Дьокуускай куоракка Д.К.Сивцев-Суорун Омоллоон аатынан Опера уонна балет театрыгар, А.Е.Кулаковскай-Өксөкүлээх Өлөксөй аатынан Норуоттар доҕордоһууларын дьиэтин сыанатыгар 13 көлүөнэ выпускниктар кыттыылаах улахан кэнсиэр ыытыллан, көлүөнэлэр алтыһыыларын доҕордуу истиҥ сыһыана үгүс көрөөччү биһирэбилин ылбыта.
Ансаамбылы Саха Өрөспүүбүлүкэтин культураҕа үтүөлээх үлэһитэ, культура туйгуна, Саха Өрөспүүбүлүкэтин ыччат политикатыгар туйгуна Валентин Константинович Козлов салайар. «Доҕордоһуу» оҕо үҥкүү народнай ансаамбыла Саха сириттэн соҕотох бэрэстэбиитэл быһыытынан ыҥырыллан, 20 киһилээх бөлөҕө балаҕан ыйын 23 күнүттэн алтынньы 2 күнүгэр диэри Соҕуруу Корея Чонан куоратыгар ыытыллыбыт Румыния, Узбекистан, Турция, Боливия, Колумбия, Кения, Польша, Мексика, Малайзия, Эквадор, Полау, Индонезия, Косово, Китай, Корея курдук улахан омук дойдуларын ансаамбыллара кыттыылаах аан дойдутааҕы норуот үҥкүүтүн күрэҕэр Россия аатын чиэстээхтик көмүскээтэ.
Тоҕус күн устата «Сүктэр кыыс тойуга» (10 мүнүүтэлээх), “Оһуохай”, “Битии”, “Чохчоохой” курдук 4 үҥкүүнү улахан былаһааккаларынан, куонкурус аһыллыытыгар парадка, мүнүүтэтигэр, сөкүүндэтигэр тиийэ ирдэбилгэ сөп түбэһэн толорон, көрөөччү-истээччи, ол иһигэр Чонан куорат мэрин биһирэбилин, сөҕүүтүн ылбыта.
Финалга «Сүктэр кыыс тойуга”, “Битии” үҥкүүлэрэ киирэн, 16 ансаамбылтан Румыния, Узбекистан, Турция, Боливия, Колумбия, Кения, Польша, Мексика, Малайзия, Эквадор, Полау, Индонезия, Косово, Китай ансаамбылларын куоһаран, III-с миэстэни, сольнай – дуэтнай үҥкүүгэ 27 кыттааччыттан Николай Матаннанов «Байанайдыын алтыһыы» үҥкүүтүнэн 4-с миэстэни ылан, кыайыы өрөгөйүн биллилэр, биир дойдулаахтарын үөртүлэр, долгуттулар.
– Онон биһиги киэн туттар ансаамбылбыт аҕыйах ахсааннаах саха норуотун культуратын, үгэһин тута сылдьарын аан дойдуга көрдөрдө, дакаастаата. Манна бэлиэтээн эттэххэ бу Соҕуруу Кореяҕа ыытыллар аан дойдутааҕы норуот үҥкүүтүн куонкурсугар Саха сириттэн аан бастакы улахан ситиһии буолар. Түгэнинэн туһанан кыттыбыт оҕолорбутугар, төрөппүттэргэ, улуустааҕы норуот айымньытын дьиэтин салалтатыгар (директор Г.Г.Вырдылин), бииргэ үлэлиир коллегабытыгар Валентин Константиновичка дириҥ махталбытын тиэрдэбит. Үлэҕэ-хамнаска ситиһиилэр өссө да кэлэ турдуннар, – диир улуустааҕы норуот айымньытын дьиэтин методиһа Күннэй Маркова.
“Таатта” хаһыат, ulus.media