Дьиҥнээх сайыҥҥы сүбэлэр.

20.07.2012 10:36 | Автор: kyym.ru | Көрдүлэр: 3613   
Печать

Инсултан, инфарктан харыстаныы

Өҥүрүк куйаас аллергиялаах, аастымалаах, тымыр-сүрэх ыарыылаах, дабылыанньалара түһэр-тахсар дьон доруобуйатыгар улаханнык дьайар. Онон маннык итии-буһуу кэмҥэ бэйэни хайдах харыстанар туһунан СӨ Медицинаҕа профилактикалыыр киинин мэтэдьиис-бырааһа Варвара Егоровна Попова сүбэлиир.

 

Куйааска тымыр кыарыыра уонна сүрэх тэбэрэ күүһүрэр, түргэтиир. Намыһах дабылыанньалаах киһи элбэх ууну сүтэрэр, ол түмүгэр хаанын эргиирэ намтыыр.

  • Элбэх уута иһиҥ. Чэй буолбакка, көннөрү сөрүүн уу ордук туһалаах.
  • Соторү-сотору дуустаныҥ.
  • Күн саамай көрөр кэмигэр, күнүс 12-тэн 16 ч. диэри, таһырдьа аҕыйахтык сылдьа сатааҥ.
  • Куйааска импиэксийэ вирустара эмиэ «күннүүллэр». Итии салгын хаан уонна ньиэрбэ систиэмэтин ноҕуруускалыыр буолан, иммунитет мөлтүүр. Сөрүүн дьиэҕэ тыал курдары охсоро, олус тымныы утах уонна тэмпэрэтиирэ уратылаһыыта (холобур, сөтүөлүүргэ) импиэксийэҕэ хаптарарга тириэрдэр. Онон С битэмииннээх аһы элбэхтик сиэххэ наада. Ол ыт тиҥилэҕэр, моонньоҕоҥҥо уонна кыһыл биэрэскэ элбэх буолар. Сайын ортото тумуулаатахха, дьиҥнээх эмтэринэн эмтэниҥ (оксолиновай маас, оциллококцинум уо.д.а).
  • Куйааска эбии-сабыы буолан ойуур баһаарын буруота—умайбыт сыбаалка састааба – дьайар. Ону кытта сиэрэ уонна хулуор баар буолар. Ол буруо ууну кытта киирэн, килиэккэ бүрүөһүннэрин алдьатар. Тыҥаны ыарытыннарар. Аастымалаах киһи бэргиэн сөп. Онон маннык кэмнэргэ күөх уонна араҕас өҥнөөх оҕуруот астарын сиэҥ, үүттэ иһиҥ.
  • Итиигэ куолай, тыҥа уонна агда салгыҥҥа баар быылы ордук күүскэ обороллор, онон аллергия үөскүүр.

Маннык кэмҥэ боруонхалара, тыҥалара, сүрэхтэрэ ыалдьар дьон,  дьиэҕитин сууйа-сото сылдьыҥ, таһырдьа мааска кэтэр ордук. Онно-манна инчэҕэй тэрээпкэни ууруҥ.

  • Бырааска сылдьан эмкитин анатыҥ. Аастымалаах ыарыһахтар тыҥаны кэҥэтэр, түргэн дьайыылаах ыстарар эмтээх сылдьыахтаахтар (астмопент, беротек уо.д.а.). Сүрэххэ  валидол, нитроглицерин курдук эмтэри уонна дабылыанньаны түһэрэр эми илдьэ сылдьыахха: бэркэ туһалыыр.

Мас сыыһа киирдэҕинэ

  • · Мас киирэн ириҥэриэн иннинэ ыла сатыахха.
  • Аһаҕас бааска ханан киирэ сылдьара көстөр буоллаҕына, хаас үргүүр тэрилинэн аа-дьуо ылыллар.
  • Дириҥник киирбит буоллаҕына, тириини кыратык кырыйыахха эбэтэр иннэнэн анньыалыахха.
  • Маһы ылбыт кэннэ дьуотунан сотуллар эбэтэр былаастырынан туттарыллар.
  • Ылбыт кэнниттэн кытаран-наҕаран иһэр буоллаҕына, түргэнник бырааска көрдөрүөххэ наада. Итии паарга ончу тутумаҥ!

Тигээйигэ тиктэрдэххэ

Бастакы ньыма: Тигээйи тикпит сиригэр ортотунан быһыллыбыт хортуосканы уонна биэс тымырдаах от улахан  сэбирдэҕин хам тутуллар. 5-7 мүн. буолан баран, хортуоскабытын уларытабыт. Маны таһынан луугу ортотунан быһан баран тутар эмиэ үчүгэй.

Иккис ньыма: 1 улахан хортуосканы уонна чосунуогу ыраастаан баран, түөркэҕэ аалан илдьиритиллэр. Иккиэннэрин булкуйан, тигээйи тикпит бааһыгар тутуллар. Ол кэннэ тымныы уунан сууйан кэбиһиллэр.

Итиигэ буcтахха

Уокка сиэппит киһи таҥаһын хайытыллыахтаах. Ыраас бырастыынаҕа сууланыллар уонна суһал көмөнү  ыҥырыллар. Туустаах ууну элбэхтик иһэрдиллэр.          Итии ууга буһууга: Итии уу тохтубут тириитигэр тымныы ууну, хаары, мууһу тутуллар.                                       Кислотаҕа сиэттэххэ: Суһал көмө кэлиэр диэри кислота сиэбит сирин суодалаах тымныы уунан сууйуллар.  Щелочь сиэтэҕинэ, уксуустаах ууга сууйуохха. Өйдөөҥ: бааһы мас арыытынан, кырахымаалынан, тууһунан, буокканан сотуллубат!

Кулгаах ыарыытыгар

Бастакы ньыма: 0,5 ыстакаан тууһу, 5 г мумиены кытта булкуйабыт уонна хобордооххо мөлтөх уокка туруорабыт. Ол кэннэ мөһөөччүккэ кутан баран ыалдьар кулгаахха 10-15 мүн. тутабыт. Маннык мөһөөччүк сойдоҕуна, сылыта-сылыта хаста да тутабыт.

Иккис ньыма: куурусса сымыыта 2 уст., 1 ч. нь алоэ сүмэһинэ, 2 ыст. оргуйбут уу наада буолар. Сымыыттары алдьамматтарын курдук, туустаах ууга буһарыллар. Буспуттарын кэннэ иһин тус-туспа араарыллар. Ол кэннэ сымыыт үрүҥ өттүн (белок) маарылаҕа суулаан баран,  сүмэһин тахсыар диэри дэлби ыгабыт. Маны алоэ сүмэһинин кытта булкуйан ыалдьар кулгаахха икки хааппыланы киэһэ аайы утуйуох иннинэ таммалатыллар.

 

 

«Силимниир күүгэн» («монтажная пена»)

Билигин тутууга араас эгэлгэ аныгы технологиялары туһанабыт. Олортон биирдэстэрэ силимниир күүгэн  буолар.

Бу мал дьиэ хайаҕастарын, быыстарын, кураанах сирдэри толорон силимниир, бүтэй оҥорор, сылааһы тутар, тыаһы киллэрбэт (шумоизоляция) аналлаах. Састааба  аатын курдук күүгэнтэн турар, салгын сиигиттэн кытаатар. Ол иһин силимниир маскыт, тааскыт, тимиргит  кыра сииктээҕэ өссө үчүгэй. Муустаах, кырыалаах эрэ буолумуон наада. Туттаргытыгар салгын +5 кыраадыстан тымныйыа суохтаах. Күүгэн 10-20 мүн. кытаатар, 24 ч. хатар. Итиини -55°С -тан +100°С диэри тутар. Хаттаҕына, 1,5-2,5 төгүл үллэрин учуоттуохха наада.

Чахчы, анал тэрилтэ оҥорбут бородууксуйата хаачыстыбата үчүгэй, күүгэнэ элбэх, үллүүтэ үгүөрү буолар. Үтүгүннэрэн оҥоруу эмиэ дэҥҥэ көстөр. Онтулара начаас ыккардыгар бүтэн хаалар, эбиитин ситэри силимнээбэт. 750 мл. иһиттээх күүгэн 250-350 солк. тэҥнэһиэн сөп.

Боллуоннаах буолан сэрэхтээх, олус итиигэ эстиэн сөп. Онон анал ирдэбилин, устурууксуйатын ааҕан эрэ баран туттуллар. Ситэри хата илик күүгэн анал убаҕаска суураллар, оттон хаппыт күүгэни хаҕылаан эрэ араараҕын. Холобур, илиигэр наһаа сыстар, илииҥ тириитин соролоон эрэ ылыаххын сөп. Төһө да сууммутуҥ иһин барбат. Онон үтүлүктээх сылдьар үчүгэй.

 

Ангелина Кузьмина