Ил Дархан айсен Николаев үбүлүөйдээх сылга төрөөбүт оҕолорго төлөбүр олохтообут үтүө холобурунан улуустар, нэһилиэктэр эмиэ кыахтарын иһинэн тус төлөбүрдэрин олохтоон эрэллэр.
Бүлүү улууһуттан Николай Куприянов улуус @bylyy_uluuha инстаграм ситимигэр суруйбутунан, I Күүлэт Саха АССР төрүттэммитэ 100 сыллаах үбүлүөйүгэр уонна Ийэ сылыгар төрөөбүт оҕолорго 10 тыһ. солк. төлөбүр оҥорорго быһаарыы ылыммыт. Олунньу 1 күнүгэр тэриллибит нэһилиэк сэбиэтин сессиятыгар дьокутааттар нэһилиэк дьаһалтатын баһылыга Айал Новиков Саха АССР төрүттэмитэ 100 сыллаах үбүлүөйүгэр сыһыаран быйыл I Күүлэккэ төрөөбүт оҕолорго 10 тыһ. солк. төлөбүрү оҥорорго ыҥырыытын өйөөбүттэр.
Бүлүү улууһун өрүс уҥуор сытар 8 нэһилиэгиттэн дьонун ахсаанынан саамай элбэҕинэн I Күүлэт нэһилиэгэ буолар. Кэрэ айылҕалаах сиргэ 860 киһи уутуйан олорор, саха сиэринэн ынах сүөһү, сылгы итиитинэн дьарыктанар. «I Күүлэт» тыа хаһаайыстыбатын оҥорон таһаарар кэпэрэтиибэ элбэх сүөһүнү, сылгыны тутар, сыллата киэҥ нэлэмэн ходуһаларыгар үгүөрү оту оттуур.
I Күүлэт нэһилиэнньэтин ахсаана сыллата эбиллэ турар, эдэр ыччат төрөөбүт дойдутугар үлэлии-хамсыы хаалар, үөрэх кэнниттэн төннөн кэлэр. Оҕо уһуйааныгар 70 кырачаан үөрэ-көтө сылдьаллар, онтон оскуолаҕа 150 оҕо билии ылар. Улуус нэһилиэктэриттэн I Күүлэккэ саамай элбэх - сылын аайы 14-16 оҕо төрүүр.
Нэһилиэк дьаһалтатын баһылыга Айал Новиков 20 сыл уһуннук үлэлээбит уопуттаах, билиилээх-көрүүлээх салайааччынан буолар. Улуус хоту баһыгар чиэски сиргэ сытар бөһүөлэк дьиэлэригэр гаас ситимэ тардыллыытыгар, тыа сиригэр суох үчүгэй Култуура дьиэтин, 150 миэстэлээх оскуола, 50 миэстэлээх оҕо уһуйаанын, Албан аат, Ийэ искибиэрдэрин тутууларыгар уо.д.а. үтүөтэ-өҥөтө элбэх.Ити курдук, үбүлүөйдээх сылга төрөөбүт оҕолору тыа сиригэр өйөөһүн Бүлүү улууһугар бастакынан I Күүлэккэ тэриллибит.
Оттон атын улуустарга, нэһилиэктэргэ маннык холобурдар бааллар дуо? Үтүө сонуннаах буоллаххытына, биһиэхэ суруйуҥ.
