Киһи барыта долгуйар, ордук оҕо-уруу тулуйбакка кэтэһэр, манаһар… харыйа аннын өҥөлдьүйэр, үөһээ тыынар, буугунуур. Бытыктаах  кырдьаҕаһынан сирэйдэнэн, бу сырыыга дьоно тугу бэлэхтиэхтэрин сураһа-билэ сатыыр. Бэйэтэ тугу ылларыан баҕарарын таайтара сатаан кыҥкыйдыыр. Дьоно буоллаҕына, наар күүттэрэр хамнастарын кэтэһэн мөҕүттэллэр-этинэллэр, ыксыыллар-тиэтэйэллэр, тойоттору-хотуттары, салгыы былаастаах дьону барытын суулуу тутан үөҕэллэр. Ким эрэ тугу эрэ ылыммыт, кимиэхэ эрэ төһө эрэ бириэмийиэ биэрбиттэр, ханна эрэ хаһан эрэ сыана түспүт, ханна эрэ, ким эрэ…

Тууй-сиэ! Бу буоллаҕа Саҥа Дьыллааҕы сүпсүлгэннэрэ! 31 чыыһыланан олох бүтэрин курдук өрүсүһүү, сүүрүү-көтүү… тыын быһаҕаһынан тиһэх күҥҥэ харчы ыһыктыбыттарыгар баазалартан, маҕаһыыннартан куулунан, хоруопканан ас таһыныы, сарсыардаттан түүн үөһүгэр диэри итии билиитэ сыралҕаныгар буһуу-хатыы, тиритии-хорутуу. Онтон? Онтон 12 чааһы сампаан оргуйар утаҕынан көрсүү, таһырдьа тахсан  кэлбит сылы уруйдаан фейерверк ытыы, төттөрү киирэн бэлэх-туһах туттарсыы, сыллаһыы-уураһыы, соһуйбута буолан күлэн аллайыы, төлөппүөн үрдүгэр түһэн билэр-билбэт дьоҥҥор эрийии, хардарыта  эҕэрдэлэһии, ис хайдыар, үөс туолуор диэри аһаан-сиэн чалларыйыы, сылы быһа хал буолбут ырыаһыттар мөссүөннэрин аҥаар харах быыһынан көрүү-истии, уһукта таарыйа түран тыыллаҥнаһыы, таал анньыар диэри үҥкүүлээн битийии, сыыйа-баайа аккаастаныы, сыр-мыр онно-манна түбэһиэх сиргэ бокуйуу. Сарсыныгар өлөттөрүү, туох эрэ дьиктини кэтэспитиҥ туолбатаҕыттан хоргутуу, санааҥ сиппэтэҕиттэн хомойуу…

Хас да күнү быһа сыһа-соһо сылдьан былырыыҥҥы аһы сии сатааһын, тиһэҕэр ыкка-куоскаҕа сыҥалааһын. Дьэ, бу буоллаҕа Саҥа Дьыллара!

Нэдиэлэни быһа айах хам буолбат бырааһынньыгыттан тартаччы таппыт көстүүмү кэтэн үлэҕэ тахсыы. Көрсүһүүнү, Саҥа Дьылы, Ороһуоспаны, Бэчээт күнүн сууйуу-сотуу. Таҥха иһиллээһин, тэриэлкэ хаамтарааһын, үргүлдьү Эргэ Саҥа Дьыллы көрсөөһүн бүппэт үлүгэрэ. Илиҥҥи халандаарга иилиҥкэйдэһэн кытайдардыын ыксалаһыы. Онтон ким эрэ төрөөбүт күнэ түбэһэ кэлэрин сууйуу, устунан Олунньу 23 күнүн көрсүү. Аҕыйах хонугунан Дьахтар күнэ ыы муннубутугар ыгар. Муус устарга Өрөспүүбүлүкэ күннүүбүт, аҕалары ахтабыт, маайдарга мачайданабыт, ыһыахпытыгар бэлэмнэнэбит, түһүлгэлэри кэрийэбит. Идэлээхтэр күннэрин ылаттыыбыт, үүнүү туһугар үрүүмпэ көтөҕөбүт, ураһаай туһугар уруйдаан ыллыыбыт, ол быыһыгар эмиэ төрөөбүт күннүүбүт. Билии күнүн биллиргэччи бэлиэтиибит, куорат күнүн куоттарбакка сууйабыт, суверенитеппытын аһыйабыт, ийэлэрбитин эҕэрдэлиибит, хомуньуустуун куомуннаһан Өктөөппүтүн өйүүбүт. Онтон эмиэ бэлиэр кэлбит Саҥа Дьылбытын кэтэһэбит. Харыйа симиибит, бадаарак көрдүүбүт, харчыбытын аһыйабыт, 12 кэнниттэн кэрэ кэскиллээх кэлэрин кэтэһэбит. Бу буоллаҕа --орто дойду бүппэт түбүгэ, бу буоллаҕа сирдээҕи олох үөрүүтэ!