Аан дойду үрдүнэн туох барыта куоталаһар идэлэнэн турбут. Бу күрэхтэһиигэ «саамай туттарбаттар» диэн номинацияҕа үс «табаарыс» бастаан тахсыбыттар:

1) Куһаҕаны оҥоруу.

2) Ваннаҕа уста сылдьар туох эрэ хара сыыс.

3) Ыһаарылана турар сымыыкка түһэн хаалбыт сымыыт хаҕа.

Суотабай сибээс начаалынньыга ситиһиилээх, үчүгэй үлэтин туһунан тоҕо-хоро кэпсии-кэпсии даачаҕа дааманы күүлэйдэтэ илдьибит. Ону баара, суотабай, даачаҕа хаппат эбит. Даама «маннык мөлтөх үлэлээх-хамнастаах киһини кытта сибээстэһэн да диэн...» — диэт тута куоппут.

***

Банаан уонна табах мөккүспүттэр, хайалара саамай ынырыктык өлөрүн быһаарсыбыттар. Банаан кэпсиир:

— Миигин бастаан тириибин сүлэллэр, онтон силлээх-сырааннаах тиистэринэн кыралаан ойута ыстаан сииллэр.

Онуоха табах этэр:

— Ону тулуйуохха сөп буоллаҕа. Санаан көр, миигин төбөбүн уматаллар уонна ол уот умуллуор диэри кэннибиттэн үрэллэр, обороллор.

***

— Hi. Where are you from?

— Hi. I from Egypt. And you?

— I from Zimbabwe.

— Simiyalaama.

— Kirjik etebin ee...

***

Кыргыттар, өскөтүн эһиги кырасыабай, өйдөөх, чэнчис, эйэҕэс, үтүө уолу көрүстэххитинэ долгуйумаҥ, кини хайыы-үйэҕэ уоллаах...

***

Интэриниэт үүт-үкчү дьиҥнээх олох курдук ээ. Сыгынньах дьахталлары, «таптаһыыны» уоран киирэн көрдөххүнэ, кырата икки вируһу хабан тахсаҕын.

***

Дьокуускай. Ырыынак. Олус эмис, төрөл дьахтар атыыһыттан ыйытар:

— Мин быһыыбар-таһаабар барсар биир эмэ бэһиэлэй куопта баар дуо?

— Мадаам, эйигин көрөн олус астынным уонна кууһан туран ытыахпын баҕардым. Хомойуох иһин, биһиэхэ эйиэхэ батар биир да таҥас суох.

***

— Тоойуом, улааттаххына туох үлэһит буолуоххун баҕараҕын?

— Тымныы оҕонньор. Биир нэдиэлэ дэлби аһыы-аһыы үлэлиигин уонна сылы быһа сынньанаҕын.

***

— Сиэн кыыһым, төрөөбүт күҥҥэр тугу баҕарабыный?

— Эбээ, эн миэхэ олус үчүгэй эр киһини көрсөрбөр баҕар. Кинитэ суох мин сатаан олорбот буолуум...

— Ол сатаммат. Мин эйиэхэ сатаан «олорор» эрэ киһигин көрсөргөр баҕарабын.

***

Биир киһи доҕорун дьиэтигэр отучча сыл буолан баран күүлэйдии кэлбит. Соһуйуон иһин, доҕоро 11 оҕону төрөтөн, күннээн-күөнэхтээн, ньиргийэн аҕай олорор эбит.

— Хайа, оҕо бөҕөтүн оҕолонон дьоллоох баҕайытык олороҕун быһыылаах?

— Ээ, хантан! Ойоҕум хаһыытыыра-ыһыытыыра, мөҕөрө-этэрэ элбэҕэ бэрт. Ол эрэ иһин... Элбэх киһи быыһыгар саһан хааллахпына, мөҕүү-этии арыый аҕыйаан тиксэр курдук.

***

Кыһыл Бэргэһэчээни ийэтэ эбэтигэр ыытар. Суумкатыгар бэрэски бөҕөнү угар уонна этэр:

— Өскөтүн эбэҥ «сотору кыһын буолар, кыстык маһым суох», «биэнсийэм кэмигэр кэлбэт буолла», «эмп сыаната олус ыараата» эҥин диэн албаһыра сатаатаҕына, адьас бэринимэ, «хайдыма». Сыанаҕын букатын түһэримэ. Хортуоппуйдаах бэрэски — 15 солкуобай, эттээх бэрэски — 20 солкуобай.

***

5:50 – өссө да эрдэ баҕайы эбит, утуйа түһүөххэ.

6:50 – оо, турар кэм кэлбит! Турбут киһи...

6:57 – туруохха наада, үскэ дылы ааҕыахха: биир... икки...

9:40 – оо-оо-уу! Иэдээн да буолар эбит!!! Хойутаабыппын дии...

***

Уоллаах кыыс суругунан билсэллэр.

— Көмүһүм, ыйааһыныҥ төһөнүй? – уол суруйар

— Быһа холоон 55 киилэбин.

— Оо, 55 киилэ дьиҥнээх кыһыл көмүскүн дуо?

— Ити туох да булкааһыга суох буоллахпына. Барыта холбоон 90 киилэбин...

***

Маҕаһыыҥҥа атыыһыт бытархай харчыта суох буолан эр киһиэхэ этэр:

— Харчыҥ ордугар ыаста атыылас, бу Микки-маустаах ыас олус минньигэс!

— Эн миигин күлүү гынан Микки-маустаах ыаһы сыҥалыыгын дуо?! Миэхэ ынырык Терминатордаах ыаһы биэр.

***

Дьахтар эрин көссүүтүгэр төлөпүөнүнэн СМС ыытар: «Мин Володяҕа саҥа туруусук атыыластым, сыаналаар эрэ». Бэрт сотору буолан баран хоруй кэлэр: «Көрдүм, үчүгэй баҕайы эбит. Ол сиэбигэр мин эйиэхэ анаан биир Рафаэлло уган ыыттым".

***

2010 сыллааҕы нэһилиэнньэ биэрэпиһин сыыппаралара:

1. Бэрэсидьиэн - 1 уст.

2. Бэрэсидьиэн ойоҕо- 1 уст.

3. Премьер-министр - 1 уст.

4. Премьер-министр ойоҕо -1 уст.

5. Алина Кабаева - 1 уст.

6. Премьер-министр ыта - 1 уст.

7. Федеральнай уонна олохтоох чунуобунньуктар - 2.347.562 уст.

8. Уо.д.а. РФ олохтоохторо - 147.892.125 уст.

***

Эр киһи арыгылаан баран дэлби «өлөттөрөн» уһуктубут. Көрбүтэ — куоската сылдьар. Эр киһи куоскатын түннүгүнэн таһырдьа кыыратан кэбиһэр. Ону көрөн туран ойоҕо кыыһыран бурҕаллан турар. Онуоха эр киһи:

— Төбөм ыалдьан өлөөрү сытабын. Онуоха эбии ити куоска төттөрү-таары хаамп да хаамп буолан өссө ыарытар.

***

Төрөппүттэрэ уолларын аармыйаҕа атаараллар.

— Кыларыйан турар кырдьыгы эрэ суруйаар, — диир ийэтэ.

— Онно бэрэбиэркэлииллэр ээ, — утарар аҕата.

— Аармыйаҕа үчүгэй буоллаҕына күөх чэрэниилэнэн суруйаар, куһаҕаннык сылдьар, атаҕастанар буоллаххына кыһыл чэрэниилэнэн суруйаар. Оччоҕуна биһиги тиийэ сылдьыахпыт. Уоллара аармыйалаабыт. Сотору буолан баран уолларын суруга тигинээн кэлэр «Барыта олус үчүгэй. Куһаҕана диэн, манна кыһыл чэрэниилэни хантан да булар кыах суох эбит».

***

Палач бириитибэ курдук сытыыламмыт сүгэтинэн былаахыга быраҕыллыбыт буруйдаах төбөтүн быһа дайбаабыт. Онуоха киһитэ саҥара сытар үһү:

— Хайа, манан бүттэ дуо?

— Бүтэн...

— Төбөнү быһаллара олох да ыалдьыбат эбит буолбат дуо?

— Оттон эн төбөҕүн хамсатан, эргичиҥнэтэн көр эрэ...

***

РФ премьер-миниистирин кыыһа оскуолатын бүтэрэн, үөрэххэ туттарсар буолбут. Куонкурус олус улахан эбит. Биир миэстэҕэ 40 университет...

***

Уол кыыстан ыйытар:

— Эн уоллааххын дуо?

— Суох.

— Хайдах? Хайдах маннык кэрэ дьүһүннээх, абылаҥнаах быһыылаах кыыс уола суох буолуон сөбүй?!..

— Аҕыйах хонуктааҕыта дьолуттан аһара үөрэн-долгуйан сүрэҕэ тохтообута...

***

Уоллара сарсыардаттан хара түүҥҥэ диэри көмпүүтэргэ олорор. Ыксаабыт төрөппүттэр быраастан сүбэ көрдүүллэр. Быраас уолу көрөн баран этэр:

— Кинини эмтиэххэ сөп эбит.

— Тугунан?

— Пиибэнэн, табаҕынан, дьахтарынан...

***

— Доо, мин бэҕэһээ таҥара дьиэтигэр сырыттым. Арай көрбүтүм: ааҥҥа дьахтар табахтыы турар. Санаан көр! Таҥара дьиэтигэр!!! Соһуйаммын тутан турбут пиибэм бытыылкатын үлтү түһэрэн кэбистим.

***

Пиибэни «убаҕас килиэп» диэччилэр, оттон буокканы «убаҕас эт» дииллэр... Мин бөлүүнү быһа бутерброд бөҕөтүн сиэбит эбиппин.

***

Кыһын. Киэһэ хойут. Устудьуон оптуобуска киирбит. Оптуобус иһигэр биир да пассажир суох. Айаннаабыттар. Тохтобулга биир кырдьаҕас эмээхсин киирэн кэлэр уонна этэр:

—Тоойуом, миэхэ, миэстэҕин туран биэр эрэ...

— Иллэҥ миэстэ элбэх дии... Ол тоҕо мин туруохтаахпыный?

— Тоойуом, мин «сылыйбыт» миэстэҕэ олорорбун сөбүлүүбүн.

***

Дэриэбинэ уулуссатын устун 120 саастаах, өссө да олорбохтуу түһэр чинчилээх оҕонньор хааман таҥкыччахтаан испит. Кинини көрсөн эдэр суруналыыс кыыс ыйытар:

— Кырдьаҕас, эн хайдах маннык уһуннук олорбут кистэлэҥҥин арыйыаҥ буолаарай? Арааһа, олоҕуҥ устата биир да сото табаҕы тардыбатаҕыҥ буолуо?

— Эс, суох. Мин ол Баай Боппуоктар аарыма кур отторун салаатынааҕар икки төгүл элбэх табаҕы тардыбыт оҕонньорбун.

— Оччотугар, эн биир да хааппыла арыгыны испэтэх буолуохтааххын?

— Туох диэн эттэххиний? Ити дэриэбинэ уһугар сытар күөл уутунааҕар икки төгүл элбэх арыгыны испит оҕонньорбун.

— Оччотугар эн биирдэ да кыыс-дьахтар диэҥҥэ сыстыбатах буолуохтааххын?

— Эс, ама дуу... Ол хотон эркинигэр хас да хотуур өйөннөрүллэн турарын көрөҕүн дуо? Ити хотуурдаах Симиэрт хотун миигин ыла кэллэҕин аайы хотуурун туура тутан ылан баран, кэннигэ тэбэн ыытабын.

***

Таҥара Ырайга сынньана олордоҕуна учуонай киирэн кэлбит уонна:.

— Айбыт аҕабыт, истэн олордоххуна этэбин. Эҕэрдэлээн кэбис, эйигин биэнсийэҕэ ыытан эрэбит. Биһиги, улуу өйдөөхтөр, эйигинэ да суох бэйэбит олоҕу оҥорор, айар буоллубут. Атыннык эттэххэ, эн сатыыргын барытын сатыыр буоллубут, – диэбит. Онуоха Таҥара:

— Бай, интэриэһинэй эбит дии. Дьэ, ол олоҕу хайдах айаҕыт?

— Биһиги бадараантан да киһини оҥорор кыахтанныбыт. Ол кэннэ киниэхэ дууһаны угабыт. Тута хамсаан барар. Көр бу... — дии-дии учуонай атаҕынан буору чөмөхтөөн эрдэҕинэ Таҥара этэр:

— Бээ, тохтуу түс. Оттон ити буоргутун ким айбыта буолуо дии саныыгын?

***

Аптекаҕа:

— Атыыга «активированнай уголь» баар дуо?

— Биһиэхэ «активируйдамматах  уголь» эрэ баар. Атыылас. Ол гынан баран 4343 диэн кылгас нүөмэргэ СМС ыыттаххына «активация кодун» ыытыахпыт.

***

Аата: Екатерина.

Араспаанньата: кистэлэҥ.

Төрөөбүт күнэ-дьыла: кистэлэҥ.

Аадырыһа: Е-mаil: ivаnоvа1985@мэйл. ру

***

Маҕаһыыҥҥа:

— Бу кууруссаҕыт бууттара туох ааттаах хараларай? Буорту буолбуттар дуу, тугуй?

— Сип-сибиэһэйдэр. Ити Буш буолбакка, Обама кууруссатын атахтара.

***

— Баанньыска, бу чиэппэргин «үһэ» суох түмүктээтэххинэ, эйиэхэ көмпүүтэр атыылаһыахпыт.

— Оттон «үстэннэхпинэ»?

— Оччоҕуна пианино атыылаһыахпыт.

***

Эр киһи уонна дьахтар кэпсэтэллэр:

— Көмүһү-өм, мин иһим улаат да улаат буолар. Арааһа, хат буоллум быһыылаах.

— Оннук бөҕө буоллаҕа... Мин эн оҕоҥ аҕатын аатын кытта билэбин.

— Кимий дьэ?

— Бэкээринэ.

***

Билиҥҥи кыра оҕолор маннык ыаллаах оонньууллар:

— Бу мин штабым. Ипотеканан атыыласпытым. Наһаа үчүгэй, коттеджтыҥы тииптээх, септиктээх эҥин.

— Суох, бу эн штабыҥ буолбатах. Кирэдьииккин ситэ төлөөбөтөх үһүгүн.

Хомуйда

Светлана ТИМОФЕЕВА.