Үөрэх дьыла чугаһаан иһэр, биһиги үөрэххэ туттарсар оҕолортон кэмин баттаһа ким ханнык үөрэххэ киирээри сылдьарын ыйыталастыбыт.
Туйаара Лазарева, 22 саастаах, Дьокуускай куорат олохтооҕо:
– Быйыл М.К. Аммосов аатынан ХИФУ-ну бүтэрдим уонна тута үөрэммит кыһабар магистратураҕа туттарса сылдьабын. Этэҥҥэ абитура бүттэ, билигин ханнык хайысханы таларбын быһаарыныахпын эрэ наада. Уопсайа үс институкка докумуоммун биэрбитим: финансово-экономическайга, устуоруйа факультетыгар уонна хотугулуу-илиҥҥи норуоттар тылларын уонна култуураларын институтугар. Үөрэхпин бүтэрдэхпинэ дьону, уопсастыбаны кытта үлэлиир исписэлиис буолуохтаахпын, ол иһин бу туттарсыбыт идэлэрбин талбытым.
Илья Шарин, 21 саастаах, Дьокуускай куорат олохтооҕо:
– Быйыл ХИФУ устуоруйа факультетын "Политология" салаатын этэҥҥэ үөрэнэн бүтэрдим. Бакалавр бырагырааматынан 4 сыл үөрэнэрим тухары билими интэриэһиргээн, ыстатыйалары суруйан, араас хабааннаах кэмпириэнсийэлэргэ кыттан кэллим. Ону таһынан, иллэҥ кэммэр бэйэм сөбүлүүр дьарыкпынан, хаартыскаҕа түһэриинэн дьарыктанабын. Биир интэриэстээх саҥа дьону кытта билсэн, доҕордоһон устудьуон көрдөөх-нардаах, умнуллубат кэмин түмүктээтим. Ол эрээри, үрдүк үөрэҕи түмүктээбиппин туоһулуур дьупулуому илиибэр тутан баран, өссө магистратура бырагырааматынан икки сыл эбии билии ыларга сананным. ХИФУ финансово-экономическай институтугар докумуоннарбын 2 хайысхаҕа биэрдим: "Государственное и муниципальное управление", "Менеджмент", ону таһынан устуоруйа факультетын "Политология" хайысхатыгар. Бу үөрэхтэргэ босхо миэстэлэргэ куонкурус түмүгэ тахсарын күүтэ сылдьабын. Магистратура инники өттүгэр, үлэ буларбар бигэ тирэх буолуо диэн эрэнэбин!
Марина Дмитриева, 16 саастаах, Үөһээ Бүлүү олохтооҕо:
– Мин Үөһээ Бүлүү оскуолатыгар тохсус кылааһы бүтэрдим. Билигин Дьокуускайдааҕы үп-экэнэмиис колледжыгар туттарса сылдьабын. Бэйэм онно сыалланан-соруктанан уонна баҕаран туран докумуоннарбын биэрбитим. Кэнники үөрэхпин үрдэтиниэхпин баҕарабын.
Арианна Афанасьева, 17 саастаах, Бүлүү олохтооҕо:
– Мин тохсус кылааһы бүтэрэн баран, “Техникум-интернат профессиональной и медико-социальной реабилитации инвалидов” диэн кыһаҕа “портной” идэтин бүтэрдим. Салгыы айар хайысханан барыахпын баҕарабын. Ол иһин “Колледж технологии и дизайна” “дизайнер” хайысхатыгар докумуоммун биэрдим.
Виктория Николаева, 23 саастаах, Дьокуускай куорат олохтооҕо:
– Мин магистратураҕа туттарса сылдьабын. Докумуоннарбын кэтэхтэн үөрэниигэ Ураллааҕы судаарыстыбаннай юридическай университекка биэрбитим. Бакалавры бүтэрэн баран, икки сыл тохтоон, билигин бэйэм баҕарар үөрэхпин уонна хайысхабын таллым. Юрист идэтэ интэриэһинэй уонна киһи барыта бэйэтин быраабын уонна эбээһинэһин билиэхтээх дии саныыбын. Билигин дьэ долгутуулаах күннэр үүннүлэр, талбыт үөрэхпэр киириэхпин наһаа баҕарабын!
Федор Кычкин, 17 саастаах, Мэҥэ Хаҥалас олохтооҕо:
– Мин бэйэм баҕаран туран Чурапчы техникумугар, МЧС үөрэҕэр “Пожарная безопасность” диэн хайысхаҕа докумуоммун туттарбытым. Атырдьах ыйын 22 күнүгэр тургутук уонна норматив туттарыахтаахпын. Нормативка ырааҕы ыстаныы, тардыныы, 100 миэтэрэҕэ уонна 1 килэмиэтиргэ сүүрүү киирэр. Барытын этэҥҥэ туттаран, үөрэнэ киириэм диэн эрэллээхпин!
Виктор Сиротин, 22 саастаах:
– Мин Новосибирскай куорат үрдүк үөрэҕин кыһатыгар СибГУТИ-га бакалавр бырагырааматын бүтэрдим. Үөрэхпин салгыы үрдэтээри, билигин эмиэ магистратураҕа «Инфокоммуникационнай технологиялар уонна сибээс ситимэ» диэн хайысхаҕа докумуоннарбын биэрдим.
Арина Стручкова
