Балаҕан ыйын 3 күнүгэр, 1941-1945 сс. буолбут Аҕа Дойду Улуу сэриитин тиэмэтинэн Арассыыйа эрэгийиэннэригэр «Кыайыы дьыктаана» норуоттар икки ардыларынааҕы историческай дьыктаан буолуоҕа. Саха сиригэр бу аахсыйаны ыытыыга анаан 655 былаһаакканы бэлэмнээтилэр. Биллэрин курдук, балаҕан ыйын 3 күнэ – Икки Аан Дойдутааҕы сэрии бүппүт күнэ.
«Биһиги дойдубутугар Улуу кыайыы туһунан ахтыы ытык өйдөбүллээх, ол эрээри, хомойуох иһин, билиҥҥи кэмҥэ олус элбэх устуоруйаны атыннык уларыта сатыыр күүс баар. Манна, биллэн турар, барыта бэйэбититтэн тутулуктаах. Биһиги билэ-көрө сылдьан эрээритин харахпытын симэр буоллахпытына, онтон туох даҕаны үчүгэй тахсыбат. Онон, устуоруйаҕа сыһыаннаах буолар туһуттан, дьыктааҥҥа кыттыы улахан суолталаах», - диэн эрдэ СӨ Ил Дархана Айсен Николаев этэн аһарбыта.
Кыайыы Дьыктаанын хас биирдиитэ 25 ыйытыктаах 2 барыйаантан турар. Хоруйдуурга 45 мүнүүтэ бэриллэр. Ыйытыылар араас хайысхалаахтар: тиэкискэ көппүт тыллары туруоран биэрии, кыайыыга аналлаах поэма ааптарын ыйыы, бу тиэкис сүнньүтүттэн куорат аатын, буолбут устуоруйа чахчытын эбэтэр ханнык байыаннай дьайыытын ыйыы. Сорох боппуруостар Аҕа Дойду улуу сэриитигэр сыһыаннаах уус-уран киинэлэри уонна монуменнары кытта сибээстээхтэр.
Дьыктааны онлайн эбэтэр былаһааккалартан биирдэстэригэр тиийэн суруйуохха сөп.
Дьыктаан ыытыллар күнүгэр, былаһааккалар күнүс 14:00 чаастан арыллыахтара, оттон дьыктаан бэйэтэ 15:00 ч. саҕаланыа.
Дьыктааҥҥа кыттыыга сайаапканы https://диктантпобеды.рф/ саайка киирэн суруттарыахха сөп. Манна ыытыллар былаһааккалар ыйылла сылдьаллар.
Саха сиригэр ааспыт сылга 535 былаһааккаҕа 16 тыһ. тахса Саха сирин олохтооҕо кыттыыны ылбыта. «Кыайыы Дьыктаана» норуоттар икки ардыларынааҕы аахсыйа 2019 сыллаахтан ыытыллар. 2021 с. ыам ыйын 9 күнүгэр ыытыллыбыт дьыктаан 20 кыайыылааҕа Москубаҕа ыытыллыбыт Кыайыы Параадыгар кыттыбыттара.
Дьыктаан тэрийээччилэрэ – «Биир ньыгыл Арассыыйа» Бүтүн Арассыыйатааҕы бэлитиичэскэй баартыйа, Арассыыйатааҕы историческай түмсүү, Арассыыйатааҕы байыаннай-историческай түмсүү уонна «Кыайыы волонтердара» Бүтүн Арассыыйатааҕы уопсастыбаннай хамсааһын, Тутулуга суох Судаарыстыбалар Доҕордоһууларын, тас дойдуларга олохсуйбут биир дойдулаахтарбыт дьыалаларыгар уонна норуоттар икки ардыларынааҕы гуманитарнай бииргэ үлэлээһин Федеральнай эгиэнистибэ, «Арассыыйатааҕы бэтэрээннэр сойуустара» Бүтүн Арассыыйатааҕы тэрилтэтэ, үөрэҕирии уонна билим надзорун Федеральнай сулууспата.
Өрөспүүбүлүкэҕэ дьыктааны ыытыы эппиэтинэстээҕэ - «Биһиги Кыайыыбыт» эрэгийиэннээҕи кэмититэ.
СӨ Ил Дарханын улнна Бырабыыталыстыбатын Пресс-сулууспата
