Олунньу 23 күнүгэр Уус Алдан улууһун Найахы нэһилиэгэр И.И.Гоголев-Дыргыабай аатынан орто оскуолаҕа Арассыыйаҕа Үөрэтээччи уонна Уһуйааччы, Саха сиригэр Үлэ сылларынан мусуой-хос аһылынна. Оскуола дириэктэрэ Мирияна Сивцева, олохтоох дьаһалта баһылыга Петр Слепцов, педагог-бибилэтиэкэр Валерия Васильева, бастыҥ үөрэнээччи Марат Дьячковскай, аалай кыһыл лиэнтэни быһан, кэлбит дьоҥҥо хоһу көрдөрдүлэр.
Тоҕус уон сыл устата үгүс элбэх үөрэнээччини иитэн-үөрэтэн олох киэҥ аартыгар атаарбыт, үтүөкэн учууталлар үлэлээбит баай устуоруйалаах үөрэх кыһатын мусуой-хоһо чинчийэр, үйэтитэр үлэни дириҥэтэр, сайыннарар, кэнчээри ыччаты гражданскай-патриотическай тыыҥҥа иитэр сыаллаах-соруктаах үлэлиэҕэ. Сүрүн муннукка 2021 сыллаахха оскуоланы бүтэрбит, бастыҥ спортсмен, уопсастыбанньык, хотуулаах үлэһит, сайаҕас майгылаах эрэллээх доҕор, үөрэнээччи, младшай сержант, танковай рота командира, "Хорсун быһыы" уордьан кавалера Николай Голиков 2022 сыл сэтинньи 1 күнүгэр Ийэ дойду көмүскэлигэр олоҕун толук уурбутун кэриэстээн, мемориальнай дуоска туруордулар.
Оскуола үөрэнээччилэрин линейкатыгар өр сылларга оскуолаҕа үлэлээбит ветеран учууталлар Вера Мухина, Мария Винокурова алгыстарын анаатылар. Бииргэ үөрэммит оҕолоро, устудьуоннар, Дьокуускай куораттан кэлэн, доҕордорун туһунан истиҥник аҕыннылар. Колябыт ийэтэ Софья Гоголева, аҕата Леонид Голиков, абаҕата, 5 оҕону уоттан быыһаабыт, "Хорсун быһыы" уордьан кавалера Валерий Голиков, чугас аймах дьоно оҕолорун олус кылгас чаҕылхай олоҕун ахтан-санаан, бары да олус уйадыйдыбыт. Дьиэ кэргэн ыарахан күннэригэр, Колябыт тиһэх суолугар атаарыыга көмөлөспүт, өйөөбүт оскуола коллективыгар, олохтоох дьаһалтаҕа, уопсастыбаннаска, доҕотторугар, биир дойдулаахтарыгар ис сүрэхтэриттэн махтаннылар. Киэһэ өттүгэр "Бары эйэлээх олох туһугар" оскуола үлэһиттэрин, үөрэнээччилэрин аахсыйа-кэнсиэригэр ыҥырдылар.
