Бэҕэһээ, атырдьах ыйын 22 күнүгэр, биһиги улуу дойдубут үөрүүлээх бырааһынньыгы бэлиэтээбитэ, Арассыыйа Федерациятын судаарыстыбаннай былааҕын Күнэ буолбута.
Бу күн Дьокуускайга, Карл Маркс аатынан искибиэргэ Өксөкүлээх Өлөксөй аатынан норуоттар доҕордоһууларын дьиэтэ Тас сибээскэ уонна норуоттар дьыалаларыгар Министиэристибэтин кытта былаах күнүгэр анаммыт бырааһынньыктааҕы кэнсиэри ыыттылар.
Үөрүүлээх дьоро түһүлгэҕэ Саха сиригэр олорор норуоттар түмсүүлэрин, национальнай-култуурунай уопсастыбаларын бэрэстэбиитэллэрэ, талааннаах дьоно кытыннылар.
Кэнсиэргэ араас омук култууратын көрдүлэр-иһиттилэр, кулгааҕы сымнатар, санааны көтөҕөр, дойдуну туругурдар ырыалар дьиэрэйдилэр.
Чаҕылхай талааннаах артыыстар, «Раздолинки» фольклорнай ансаамбыл солиһа Александр Мигалкин, Иркутскай уобалас Киренскэй куоратыттан «Оберег» фолк-дуэт Ольга Ковалдо уонна Елена Казакова, «Молодая Якутия» православнай патриотическай кулууп кадетскай куорпуһун чилиэттэрэ, «Раздолье» норуодунай хор солиһа Надежда Сахно, «Сырдык сүүрээн» Оҕо образцовай ырыа ансаамбылын солиһа Изольда Брызгалова, тувин омук бэрэстэбиитэлэ Сандак Самбажык, хотугу төрүт аҕыйах ахсааннаах омуктар бэрэстэбиитэллэрэ Михаил Рожин, «Колымчанка» дьүкээгир фольклорнай ансаамбыла, «Раздолье» народнай хор квартета, кыргыыс омук бэрэстэбиитэлэ Бектур Калдаров, таджик норуотун бэрэстэбиитэлэ Парвиз Гулов, «Контраст» айымньылаах түмсүү уо.д.а. кыттыыны ыллылар.
Маны сэргэ, бырааһынньык биир үөрүүлээх тэрээһинэ - плов астааһын. Азия омуктарын үтүө аһылыгын СӨ таджиктарын сойууһун, СӨ кыргыыстарын кэнгириэһин, «Узбек омук култууратын киинэ» тэрилтэтин, СӨ Ыччакка Ассамблеятын кыттааччылара, бастыҥ асчыттара астаатылар.
Аһаҕас халлаан анныгар буолбут ураты кэнсиэртэн көрөөччүлэр сэргэхсийдилэр, оттон минньигэс аһылык дыргыл сыта баһылаан, киһи санаата дьайҕаран, хатыламмат тэрээһин буолан ааста.
