Ыам ыйын 14-17 күннэригэр Хайалаах Алтаайга Бүтүн Арассыыйатааҕы түүр тылларыгар уонна литэрэтиирэтигэр устудьуоннар XII олимпиадалара буолан ааста.
Биһиги Өрөспүүбүлүкэбититтэн М.К. Аммосов аатынан ХИФУ ХИНТуоКИ устудьуоннара ситиһиилээхтик кыттан кэллилэр. Хамаанданы тыл билимин кандидата, дассыан Ирина Николаевна Сорова салайан илдьэ сырытта.
Араас сиртэн 8 хамаанда кэлэн кытынна ( Башкортостантан — 3, Хакасияттан, Тываттан, Казахстантан, Саха Сириттэн уонна Хайалаах Алтаай бэйэтин хамаандата). Маҥнайгы күн Бүтүн Аан дойдутааҕы билим кэмпириэнсийэтэ, норуоттар төрүт оонньууларыгар маастар кылаас, ону тэҥэ "Алтаай кинигэтэ" бэстибээл буолан ааста. Иккис күн устудьуоннар тылга олимпиада сорудахтарын толордулар. Үһүс күн литэрэтиирэҕэ, фольклорга олимпиада уонна түүр култуураларын бэстибээлэ буолла.
Манна хамаандалар иккилии нүөмэр туруоран бэйэлэрин култуураларын билиһиннэрдилэр. Төрдүс күн — түмүк истиитэ уонна доҕордоһуу киэһэтэ. Хамаанданан миэстэҕэ биһиги университеппыт хамаандата иккис бочуоттаах миэстэни ылла.
Тус миэстэҕэ түүр тылларыгар иккис миэстэни Күннэй Аргунова, 3-с миэстэни Айтал Бурцев уонна литэрэтиирэҕэ Христофор Захаров 1-кы миэстэни ылан үөрүүлэрэ үксээтэ. Ону таһынан, Сайыына Борисова, Сардаана Никифорова "Түүр тылларыгар бастыҥ билиилэрин иһин", Света Адамова "Бастыҥ уус-уран айымньыны ырытыытын иһин" анал ааттары ыллылар. Саха устудьуоннара түүр тылларын билиигэ үрдүк таһымнаахтарын өссө төгүл дакаастаатылар.
