Бу күннэргэ бассаапка “бэтэринээр өҥөтүн сыаната киһи сатаан төлөһүө суоҕун курдук үрдээн эрэр” диэн сурах тарҕанна. Ол гынан баран, СӨ Бэтэринээрийэҕэ департамена “Саха сиригэр бэтэринээрийэ төлөбүрдээх өҥөтүн сыаната ыараабат. Сыананы Үп министиэристибэтэ быһар” диэн бигэргэттэ.
2018 сылга бэтэринээр өҥөтүн сыаната төһө-хачча буолбутун көрдөрөр анал прейскурант Бэтэринээрийэ департаменын официальнай саайтыгар суруллан турар. Онно көстөрүнэн “Пааспар оҥорон туран кыылы бэлиэтээһин” диэн өҥө (ыт, куоска, о.д.а. кыыл диэн араарбакка туран) 2018 с. тохсунньу 1 күнүнээҕи туругунан, 72 солк. быһыллыбыт. Ииригириини (чума) утары вакцина – 223 солк, үөн, тарыҥ утары (ол иһигэр бэтэринээр сүбэтэ киирэр) – 134 солк., быты (эктопаразиттар) утары – 117 солк.
Оттон төлөбүрдээх анаалыс сыаната Арассыыйа атын эрэгийиэннэрин кытта тэҥнээтэххэ, хас да бүк чэпчэки. Холобур, Хабаровскай кыраай сыаната үс, оттон Камчааккаҕа инньэ биэс төгүл ыарахан.
Аны туран, биирдиилээн чааһынай килииньикэлэр сыананы бэйэлэрэ олохтууллара көҥүл буоларын умнумаҥ.
