Баара-суоҕа 49 сааһыгар Москубаҕа командировкаҕа сылдьан “Сахамедиа” РИИХ генеральнай дириэктэрэ Кирилл Алексеев күн сириттэн соһумардык барда.
Бүгүн кини олоҕун тиһэх күннэригэр диэри үтүө суобастаахтык үлэлээбит сиригэр – Бэчээт Дьиэтин медиакиинигэр – бырастыылаһыы буолла. “Ситим” медиа бөлөх аатыттан Кирилл Викторович чугас дьонугар, аймахтарыгар, табаарыстарыгар, кэллиэгэлэригэр дириҥ кутурҕаммытын биллэрэбит.
Мария Христофорова, “Ситим” медиа бөлөх генеральнай дириэктэрэ:
– Соторутааҕыта аҕай Хабаровскай куоракка Кирилл Викторовиһы кытары “Дальний Восток – приоритет России в XXI веке” диэн Уһук Илиннээҕи медиафорумҥа кыттыбыппыт. Онно кини бэчээт эйгэтигэр баар кыһалҕалары кэпсээбитэ уонна билиҥҥи усулуобуйаҕа ону хайдах туоратарга, бэчээти сайыннарыыга бэйэтин көрүүлэрин кэпсээбитэ.
Бүгүн АЛРОСА хаһаайыстыбаннай актыыбын мунньаҕар кытта сылдьан, Кирилл Викторовиһы кытары Мииринэйгэ көрсүһүүлэрбитин ахтан-санаан ыллым. Кини бу “АЛРОСА” хампаанньа сыллааҕы саамай улахан быйылгы мунньаҕар эмиэ кыттыахтаах этэ. Кирилл Викторовиһы кытары араас тиэмэҕэ ирэ-хоро кэпсэтэрбитин олус сөбүлүүр этибит. Ардыгар мөккүһэн да ылааччыбыт. Ол гынан баран, бэйэ-бэйэбитигэр куруук ытыктабыллаах сыһыаннаһарбыт.
Мин кини тыыннааҕар тус бэйэтигэр да эппитим, билигин даҕаны махталбын биллэриэм этэ: кини үп-харчы кырыымчык кэмигэр “Кыым” норуот хаһыата чэпчэтиилээх сыананан “Якутия” медиахолдинг типографиятыгар бэччээттэнэр кыаҕы биэрбитин иһин. Кирилл Викторович биһиги тэрийбит Арассыыйа национальнай СМИлэрин Ассоциациятын тэрийбиппитин өйөөбүтэ. Кини Роспечать Эспиэрдиир сэбиэтин чилиэнин быһыытынан Арассыыйа национальнай СМИлэригэр чэпчэтиини туруорсарга бииргэ үлэлэһэр былааннааҕа.
Биһиги баар-суох кэллиэгэбит олус эрдэ уонна соһуччу биһиги кэккэбититтэн туораата... Кини национальнай бэчээт сайдыытыгар сыраласпыт үлэтин ситэ салгыахпыт, бэчээт эйгэтэ инникилээх буоларыгар турууласпыт үлэтин олоххо киллэрсиэхпит.
Тус бэйэм, бииргэ үлэлиир кэллиэгэлэрим, суруналыыстар уонна “Ситим” хампаанньа бөлөҕүн аатыттан Кирилл Викторович чугас дьонугар, дьиэ кэргэнигэр дириҥ кутурҕаммын биллэрэбин.
Аһыыгытын тэҥҥэ үллэстэбит!
Ыспыраапка:
Кирилл Викторович Алексеев 1969 сыллаахха бэс ыйын 1 күнүгэр Дьокуускайга төрөөбүтэ.
Саха судаарыстыбаннай университетын 1995 сыллааха бүтэрбитэ, 2011 сыллаахха – МГУ журналистика факультетын.
1995 сыллаахха биир санаалаахтарын кытары “Наше время” өрөспүүбүлүкэтээҕи уопсастыбаннай-бэлитиичэскэй хаһыаты төрүттээбитэ.
1997 сылтан – “Наше время” хаһыат кылаабынай эрэдээктэрэ.
1999-2004 сс. – “Наше время” хаһыат сүрүн эрэдээктэрэ – генеральнай дириэктэрэ.
2004-2008 сс. – “Столица” телерадиокомпания генеральнай дириэктэрэ.
2008-2012 сс. – “Наше время” издательскай дьиэ генеральнай дириэктэрэ.
2012 сыл сэтинньититтэн – “Сахамедиа” РИИХ генеральнай дириэктэрэ. “Сахамедиа” иһигэр “Якутия”, “Саха сирэ”, “Комсомольская правда” в Якутии” хаһыаттар, “Якутия” медиахолдинг уонна Саха информационнай ааҕыныстыба (СИА) киирэр.
СӨ Бэчээтин туйгуна.
