Дьокуускай к. “Точка кипения” бииргэ үлэлэһии киинигэр СӨ судаарыстыбаннай уонна официальнай тылларын харыстааһыҥҥа уонна үөрэтиигэ аналлаах оонньууну оҥоруу куонкуруһун финала ыытылынна. Кыттааччылар бэйэлэрэ айан таһаарбыт мобильнай оонньууларын прототибын билиһиннэрдилэр.
Ил Дархан Айсен Николаев этэн аһарбытын курдук, төрөөбүт тыл сайдыытыгар биир саамай туһалаах ньыманан смартфон сыһыарыытын оҥоруу буолар, биһиэхэ бу ньыма көхтөөхтүк сайдар.
Куонкурус сыала-соруга – судаарыстыбаннай уонна официальнай тыллар суолталарын үрдэтии, ыччат тылы үөрэтэр эйгэтин тэрийии уонна көмпүүтэр оонньуутун оҥорооччулары өйөөһүн.
Куонкурус үс кэнсиэпсийэнэн ыытыллынна: казуальнай-гибрид оонньуу; оҕолорго оонньуу; геймифицированнай сыһыарыы.
Барыта 4 прототип көрдөрүлүннэ:
Alaas-Cold Farm (Сюжета – ферма туһунан, оонньууга бэриллэр икки дьыл кэмигэр (сайын, кыһын) хаһаайыстыбаҕын сайыннарыахтааххын. Геймплей – оонньооччу фермер оруолугар оонньуур, кини сыала улахан хаһаайыстыбаны тэрийии;
Мас-рестлинг: тыл оонньуута, оонньооччулар тылы толкуйдааһыҥҥа күрэхтэһэллэр. Хас биирдии таайыллыбыт тыл утарылаһааччы эньиэргийэтин мөлтөтөр;
Саха сирин төрүт омуктарын тылларын үөрэтии сыһыарыыта (бу сыһыарыыга аныгы технология, үгүс саҥаны үөрэтэр контент, эрэгийиэммит тылларын үөрэтиигэ уонна харыстааһыҥҥа аналлаах туһалаах үнүстүрүмүөн бииргэ холбоммут. Ону таһынан Саха сирин култууратын көрдөрөр-билиһиннэрэр сыаллаах);
Саха сканворд (Сахалыы сканворду таайан, саҥаттан саҥат таһымнары ааһыы уонна төрөөбүт тылы үөрэтии).
Прототиптары барыларын бу сыл бүтүөр диэри тупсаран оҥоруохтара уонна ахсынньыга Android уонна IOS платформатыгар таһаарыахтара.
Куонкурус түмүгэн хамыыһыйа түөрт кыайыылааҕы таһаарда:
1 миэстэ – Вячеслав Кривогорницын, «Alaas-Cold Farm»;
2 миэстэ – Алексей Илларионов «Мас-рестлинг:слова»;
3 миэстэ – Баир Дамдинжапов «Приложение-самоучитель по изучению коренных языков Якутии»;
4 миэстэ – Виктор Махатыров, Августина Семенова «Саха сканворд».
Кыайыылаахтар бырайыактарын бу сыл ахсынньытыгар диэри олоххо киллэрэргэ үбүлээһини ылыахтара.
Куонкуруһу СӨ Инновация, сыыппара сайдыытын уонна инфокоммуникационнай технология министиэристибэтэ, “Якутия” технопаарка, СӨ Инновация сайдыытын пуондата тэрийэн ыыттылар.
СӨ Ил Дарханын уонна Бырабыыталыстыбатын пресс-сулууспата.
